विरेंद्र म्हात्रे नवी मुंबई प्रतिनिधी
: मुंबई-पुणे एक्सप्रेस वेवर झालेल्या अपघातात पाच जणांचा मृत्यू झाला आहे तर पाच जण जखमी झाले आहेत. जखमीनां जवळच्या रुग्णालयात हलविण्यात आले असून मृतांमध्ये नवी मुंबईतील एकाच कुटुंबातील चार जणांचा समावेश आहे. मुंबईकडे येणाऱ्या मार्गावर खालापूर टोलनजीक फुडमॉलजवळ सोमवारी रात्री साडे बारा वाजण्याच्या सुमाराला हा भीषण अपघात झाला.
याबाबत वृत्त असे की पुणे एक्सप्रेस वेवर मुंबईच्या दिशेने जाणाऱ्या एका कंटेनरने टेम्पोला मागून धडक दिली. त्यामुळे पलटी झालेल्या टेम्पोला मागून येणाऱ्या दोन कार धडकल्या. त्याचवेळी पाठीमागून येणाऱ्या टेम्पोने या दोन्ही गाड्यांनी धडक दिल्याने झालेल्या अपघातात पाच जणांचा मृत्यू झाला आहे. या अपघातात नवी मुंबईतील डॉक्टर वैभव झुंजारे यांची आई, पत्नी आणि 5 वर्षीय मुलीचा मृत्यू झाला असून ११ वर्षांचा मुलगा गंभीर जखमी झाला आहे. तर, दुसऱ्या कारमधील एका महिलेचा मृत्यू झाला आहे
डाॅ. वैभव झुंजारे नवी मुंबई महानगरपालिकेत पशुवैद्यकीय अधिकारी म्हणून कार्यरत होते. डाॅ. वैभव झुंझारे हे आपल्या कुटुंबासमवेत पुण्याला एका कार्यक्रमासाठी गेले होते. पुण्याहून मुंबईला परतत असताना फुडमॉल जवळ हा अपघात घडला आहे. या अपघातात मंजू नाहर, डॉ. वैभव झुंझारे, उषा झुंझारे, वैशाली झुंझारे, श्रिया झुंझारे यांचा मृत्यू झाला आहे. तर स्वप्नील कांबळे, प्रकाश नाहर, अर्णव झुंझारे, किशन चौधरी, काळूराम जाट हे जखमी झाले आहेत.
