नांदेड जिल्हा प्रतिनिधी:संजीवकुमार गायकवाड
नांदेड:दि.7.आयडीबीआय बॅंक आणि शंकर नागरी बॅंक ही दोन्ही प्रतिष्ठाणे 14 कोटी 50 लाख रुपयांच्या हॅकींगबद्दल हात झटकतांना दिसत आहे. आयडीबीआय ही बॅंक वजिराबाद भागात असल्याने वजिराबाद पोलीस ठाण्यात सुध्दा याबद्दल तक्रार देण्यात आली आहे. वजिराबादचे पोलीस निरिक्षक संदीप शिवले यांनी सांगितले की, सायबर तंत्रज्ञ व्यक्ती या प्रकरणाची तपासणी करतील आणि त्यानंतर हा गुन्ह्याचा प्रकार आहे काय याचा निर्णय होईल. दोन्ही बॅंकांनी आपल्या रक्कमांचा विमा केलेला आहे. त्यामुळे या घटनेला कांही वेगळे वळण लागणा काय अशी चर्चा आज सुरू झाली आहे.
शंकर नागरी सहकारी बॅंकेचे व्यवस्थापक विक्रम राजे यांनी शिवाजीनगर पोलीस ठाण्यात दिलेल्या तक्रारीनुसार आयडीबीआय बॅंकेत शंकर नागरी बॅंकेचे खाते आहे. 27 डिसेंबर ते 2 जानेवारी या दरम्यान शंकर नागरी सहकारी बॅंकेच्या खात्यातून 14 कोटी 46 लाख 5 हजार 347 रुपये हॅर्कसने आरटीजीएस माध्यमातून गायब केल्याची बाब समोर आल्यनंतर 5 जानेवारी रोजी पोलीस ठाणे शिवाजीनगर येथे तक्रार दिली आणि आपल्या 14 कोटी 50 लाख रुपयांची भरपाई करून देण्याची मागणी केली. शिवाजीनगरला दिलेल्या तक्रारीत आयडीबीआय बॅंकेच्या वजिराबाद शाखेतून हा सर्व प्रकार घडल्याचे लिहिले आहे. त्यामुळे दुसरी तक्रार पोलीस ठाणे वजिबाद येथे देण्यात आली.
याबाबत प्राप्त झालेल्या माहितीनुसार आयडीबीआय बॅंक सांगते आहे की,शंकर नागरी सहकारी बॅंकेचे संदेश आल्यानंतरच आयडीबीआय बॅंकेने त्यांच्या खात्यातील रक्कम त्यांच्या संदेशाप्रमाणे वळती केलेली आहे.त्यामुळे जबाबदारी कोणाची हा प्रश्न उपस्थित झाला आहे. वजिराबादचे पोलीस निरिक्षक संदीप शिवले यांच्याकडे याबाबत विचारणा केली असता त्यांनी सांगितले की,शंकर नागरी बॅंक रिजर्व्ह बॅंक ऑफ इंडियाच्या नियमावलीप्रमाणे आयडीबीआयने आमचे 14 कोटी 50 लाख रुपये द्यावेत असे सांगत आहेत.आयडीबीआय शंकर नागरीच्या संदेशाप्रमाणेच आमच्या बॅंकेतील खात्यातून रक्कमा वळती झाल्या असे सांगते आहे.त्यामुळे या प्रकरणात सर्व्हर तंत्रज्ञ असलेल्या व्यक्तीकडून याबाबतची सर्व माहिती घ्यावी लागेल, कोणाच्या संदेशाने कोणाच्या खात्यात करोडो रुपये वळवले गेले याची महिती घ्यावी लागेल आणि तंत्रज्ञ सांगतील त्याप्रमाणे या बाबीचा निर्णय पुढे होईल.
शंकर नागरी सहकारी बॅंकेचे व्यवस्थापक विक्रम राजे यांनी दुरध्वनी वरून विचारणा केली असता त्यांनी सांगितले की,शंकर नागरी सहकारी बॅंकेच्या ठेवीदारांना यामुळे कांही अडचण येणार नाही. कारण शंकर नागरी सहकारी बॅंकेचे 114 कोटी रुपये आयडीबीआय बॅंकेत जमा आहेत.सोबतच शंकर नागरीच्या आणि आयडीबीआयच्या रक्कमांचा विमा असल्याची माहिती विक्रम राजे यांनी दिली. विमा प्रकरणांमध्ये इतिहासात अनेक घोटाळे झालेले आहेत. त्यामुळे आयडीबीआय आणि शंकर नागरी यांच्यामध्ये विमा संदर्भाने हा घोटाळा झाला असेल काय?अशी चर्चा आता सुरू झाली आहे.
