Categories
इंदापूर

पर्यावरण संवर्धनासाठी 5000 वृक्ष लागवडीचा संकल्प- अंकिता हर्षवर्धन पाटील

इम्तिहाज मुलाणी :
इंदापूर (प्रतिनिधी):- इंदापूर तालुका शिक्षण प्रसारक मंडळाच्या येथील कला, विज्ञान आणि वाणिज्य महाविद्यालयामध्ये जिल्हा परिषद सदस्या अंकिता हर्षवर्धन पाटील यांच्या वाढदिवसानिमित्त त्यांच्या हस्ते महाविद्यालयात बेलाचे रोप लावून वृक्षारोपण करण्यात आले. अंकिता पाटील यांच्या हस्ते विद्यार्थी, शिक्षक, शिक्षकेतर कर्मचारी यांना 105 बेलांच्या रोपांचे वाटप करण्यात आले. संस्थेचे अध्यक्ष व माजी मंत्री हर्षवर्धन पाटील, संस्थेच्या उपाध्यक्षा पद्मा भोसले, सचिव मुकुंद शहा, प्राचार्य डॉ. संजय चाकणे, उपप्राचार्य प्रा. नागनाथ ढवळे, यांच्या मार्गदर्शनाखाली गेल्या अनेक वर्षांमध्ये महाविद्यालयात मान्यवरांचा वाढदिवस महाविद्यालयामध्ये वृक्षारोपण करून साजरा केला जातो तसेच या रोपांचे संवर्धन करण्याची देखील जबाबदारी महाविद्यालय घेते. अंकिता पाटील म्हणाल्या की,' वाढदिवस हे औचित्य असून सामाजिक बांधिलकी लक्षात घेता पर्यावरणीय जनजागृतीसाठी इंदापूर तालुक्यामध्ये 5000 वृक्ष लागवडीचा संकल्प केला असून यामध्ये युवक युवतींचा सहभागाबरोबरच नागरिकांनी मोठ्या प्रमाणात वृक्षारोपण केल्याने आनंद झाला आहे. कोरोना पार्श्वभूमी असल्याने आपण नागरिकांना सामाजिक बांधिलकीसाठी पर्यावरणीय संवर्धनाच्या उपक्रमासाठी आवाहन केले होते. नागरिकांनी या उपक्रमास मोठा प्रतिसाद दिला आहे.

अंकिता पाटील यांचे कार्य तसेच सामाजिक बांधिलकीतून त्यांनी राबवित असलेल्या विविध उपक्रमाची माहिती प्रास्ताविकात क्रीडासंचालक डॉ. भरत भुजबळ यांनी दिली.
यावेळी विज्ञान विभाग प्रमुख डॉ. शिवाजी वीर, ग्रंथपाल प्रा. मनीषा गायकवाड, प्रा. कल्पना भोसले उपस्थित होते.
कार्यक्रमाचे सूत्रसंचालन प्रा.रोहिदास भांगे यांनी केले. आभार प्रा. सुनील सावंत यांनी मानले.

Leave a Reply

Create your own website, free on WordPress.com.Create your own website.
Start free