Categories
Uncategorized

अन् त्या माऊलीला घडले साक्षात विठुरायाचे दर्शन.पाटण हिंदू सम्राट प्रतिनिधी उमेश सुतार यांजकडून

विठुरायाच्या मनात असेल तर त्याचे दर्शन घडते, असे म्हणतात. त्याचा प्रत्यय सोमवारी (ता. 28) मोहोळ तालुक्‍यातील एका साठ वर्षीय माऊलीला आला. फेसबुकवर एक महिला “विठाई एसटी’वर रंगवलेल्या विठुरायाचे दर्शन घेत असल्याचा फोटो व्हायरल झाला होता. योगायोगाने त्या येथील रामकृष्ण महाराज वीर यांना पंढरपुरात दिसल्या आणि त्यांनी मंदिर समितीचे कार्यकारी अधिकारी विठ्ठल तथा सुनील जोशी यांच्याशी संपर्क साधला. त्यांनी तातडीने त्या माऊलीला मंदिरात बोलावून त्यांचा सत्कार करून विठुरायाचे दर्शन घडवले.

एसटी महामंडळाच्या विठाई एसटी गाड्यांवर विठुरायाचे चित्र रंगवण्यात आलेले आहे.

काही दिवसांपूर्वी मोहोळ तालुक्‍यातील रामहिंगणी गावातील विठूभक्त महिला सईबाई प्रकाश बंडगर या मोहोळ बस स्थानकावर उभ्या होत्या. त्या वेळी विठाई बसवरील विठुरायाचा फोटो पाहून त्यांनी बसजवळ जाऊन विठुरायाच्या चित्रावर डोके टेकवून दर्शन घेतले. बस स्थानकावर उभा असलेल्या एका व्यक्तीने हा प्रसंग त्याच्या मोबाईलमध्ये टिपला आणि फेसबुकवरून फोटो व्हायरल केला होता. या फोटोला सोशल मीडियातून मोठा प्रतिसाद मिळाला होता.

दरम्यान, सोमवारी रामकृष्ण महाराज वीर यांना वासकर फडावरील भक्त असलेल्या बंडगर मावशी पंढरपुरात भेटल्या. वीर महाराज यांनी त्यांच्याकडे आपुलकीने विचारपूस केली. त्यांच्याशी बोलत असताना फेसबुकवर काही दिवसांपूर्वी व्हायरल झालेला फोटो त्या माऊलीचा होता याची त्यांना खात्री झाली. ऑनलाइन दर्शनाचे बुकिंग केलेले नसल्यामुळे त्यांना दर्शन मिळू शकणार का, असा प्रश्न वीर महाराज यांना पडला. त्यांनी मंदिर समितीचे कार्यकारी अधिकारी विठ्ठल जोशी यांच्याशी त्वरित संपर्क साधला. श्री. जोशी यांनी तत्काळ गाडी पाठवून त्या माऊलीला मंदिरात आणले. रुक्‍मिणीमातेचा प्रसाद म्हणून साडी आणि श्री विठ्ठल- रुक्‍मिणीचा फोटो भेट देऊन सत्कार करून त्या माऊलीला प्रत्यक्ष विठुरायाचे मुखदर्शन घडवले. अनेक महिन्यांपासून विठ्ठलाच्या दर्शनाची ओढ मनाशी असताना अचानकपणे साक्षात विठुरायाचे दर्शन घडल्याने त्या माऊलीला आनंदाश्रू आवरले नाहीत. वीर महाराज आणि विठ्ठल जोशी यांना त्यांनी धन्यवाद दिले.

Leave a Reply

Create your own website, free on WordPress.com.Create your own website.
Start free