आमचे सरकार जर पाच वर्षे टिकले तर…? विकास कामे करू व मते मागू – अजित पवार

इंदापूर येथील पीडीसी बँकेच्या नूतन इमारतीसह अनेक विकास कामाचे उपमुख्यमंत्री अजित पवार यांचे हस्ते उद्घाटन : विरोधकांसह पक्षातील कार्यकर्त्यांवरती जोरदार टोलेबाजी

इम्तिहाज मुलाणी :
इंदापूर (प्रतिनिधी):

इंदापूर : पुणे जिल्हा मध्यवर्ती सहकारी बॅंकेच्या इंदापूर विभागीय कार्यालय तसेच जुन्या पुणे सोलापूर महामार्गावरील बॅंकेच्या नूतन शाखेचे उदघाटन महाराष्ट्र राज्याचे उपमुख्यमंत्री अजित पवार यांच्या हस्ते शनिवारी (ता. 6 फेब्रुवारी) पार पडले.

या वेळी पवार आपल्या भाषणात म्हणाले की, इंदापूर नगरपरिषद आमच्या राष्ट्रवादी पक्षाच्या ताब्यात नसताना सुद्धा आम्ही ३३ कोटी रुपयांचा निधी इंदापूर नगरपरिषदेच्या विकास कामांसाठी मंजूर केला. जर इंदापूरची नगरपरिषद आमच्या पक्षाच्या ताब्यात असती तर आम्ही इंदापूर साठी जास्तीत जास्त निधी मंजूर केला असता आणि इंदापूरचा चेहरामोहरा बदलून टाकला असता. या पुढील काळात आपण इंदापूरकरांनी जर आमच्या पक्षाला साथ दिली तर आम्ही इंदापूरची कायापालट करू. यापुढे आमचे सरकार जर पाच वर्षे टिकले तर….. इंदापूर मध्ये व इंदापूर तालुक्यात अनेक विकास कामे करू आणि त्या जोरावर ती जनतेला मते मागू.

यापुढे जाऊन पवार यांनी माजी मंत्री हर्षवर्धन पाटील यांचे नाव न घेता त्यांना टोला लगावला, याच्या अगोदर सुद्धा आमचे सरकार असताना इंदापूर येथील नेत्याला मंत्रिपदे मिळाली होती. परंतु त्यांना इंदापूरचा विकास करता आला नाही. त्यांनी आपल्या स्वार्थासाठी व आपली पोळी भाजण्यासाठी पक्ष बदलला.

यापुढेही जाऊन त्यांनी आप्पासाहेब जगदाळे यांचेही नाव न घेता त्यांना टोला लगावला की, आमच्या राष्ट्रवादी पक्षाने इंदापूर तालुक्यातील नेत्याला कृषी उत्पन्न बाजार समितीचे सभापती पद दिले. परंतु त्यांनीही स्वतःच्या स्वार्थासाठी विधानसभा निवडणुकीच्या वेळी दुसऱ्याला मदत केली.

या वेळी व्यासपीठावरील उपस्थित इंदापूर तालुक्यातील पुढारी आणि कार्यकर्त्याकडे पाहून तुम्ही सर्वांनी एकजुटीने काम केले असते, तर बारामतीप्रमाणे विरोधकाचे अनामत रक्कम जप्त झाले असते, वालचंदनगर मध्ये साहेबांच्या आजूबाजूला बसणारे यांनी फसवलं तसेच इंदापूर तालुक्यातील अनेक जणांनी फसवाफसवीचे काम केले आहे . इथून पुढे असं चालणार नाही असा कडक इशारा देत त्यांनी इंदापुर तालुक्यातील राष्ट्रवादीच्या नेत्यांना चिमटा घेतला. 
या वेळी जिल्हा बॅंकेचे अध्यक्ष रमेश थोरात, जिल्हा बॅंकेच्या उपाध्यक्ष अर्चना घारे, राष्ट्रवादी महिला कॉंग्रेसच्या जिल्हाध्यक्ष वैशाली नागवडे, तालुकाध्यक्ष छाया पडसळकर, शहराध्यक्ष उमा इंगुले, व इतर राष्ट्रवादीचे पदाधिकारी, कार्यकर्ते, सरपंच, सदस्य या कार्यक्रमास उपस्थित होते.